Balade 675 : Il fait tresbeau demourer (MXXXVII)

Balade

                        Il fait tresbeau demourer
                        En doulz chastel de Pavie,
                        Ou l’en seult dames trouver
                        Qui mainent joieuse vie.
5                      Car c’est noble compaignie
                        Et qui dance voluntiers.
                        La festoient estrangiers
                        Les dames et damoiselles.
                        Noble lieu, plaisans vergiers
10                    Ont pour deduire les belles.

                        Bien se scevent ordonner.
                        Chascune est gaie et jolie.
                        Dancer scevent et chanter
                        Doucement. N’y faillent mie.
15                    Moult ont de bien faire envie.
                        Chevaliers et escuiers,
                        Veans leur douçour premiers,
                        Leurs biens, le grant honeur d’elles,
                        Robes, joyaulx et deniers
20                    Ont pour deduire les belles.

                        Si doit on bien honourer
                        De Vertus ma dame lie,                                                                       273d
                        Le conte et sa terre amer
                        Qui Bourgoingne et sa mesgnie
25                    Et Touraine, en Lombardie
                        Ont tenus comme amis chiers,
                        Donné chevaulx et coursiers.
                        Draps d’or, hernois, joyaulx, selles
                        D’orfroy[1], aprés les mangiers,
30                    Ont pour deduire les belles.

                        L’envoy

                        Princes, ne m’en puis aler.
                        Trop doubte le rapasser
                        En ces montaignes crueles.
                        Pavie me fait penser
35                    A l’aise, et au bon vin cler
                        Qu’ont pour deduire les belles.

[1] Ms. Deffroy