Balade 673 : Je ne me sçay a quele heure lever (MXXXV)
Balade
Je ne me sçay a quele heure lever
Ne en quel jour je me doye mouvoir.
Se levéz suy, si je m’en doy aler
Ou si je doy a l’ostel remanoir.
5 Et si je monte a cheval,
Et chevaulx chiet, ou moy, je me faiz mal.
S’a piet m’en vois, le traveil me deçoit.
Se j’entre en nef, je plunge contreval,
Car, chascun jour, meschiet il qui que soit.
10 Si je m’en vois au moustier pour orer,
Je me feray ypocrite apparoir.
Si je m’en vois a la court demourer,
Il y a bien maniere du manoir.
Si je vueil estre vassal,
15 Armes suir o prince ou seneschal,
En un moment seray tué tout roit.
Qui monte haut il puet cheoir a val :
Car, chascun jour, meschiet il qui que soit.
Se femme prans, d’elle me fault doubter,
20 Car je ne puis son malice sçavoir.
S’argent reçoy, il me fauldra compter.
Se juges suis, aux pars me fault seoir.
Se j’ay argent a estal,
Prester me fault, n’en ray pas sort egal.
25 Nulz au jour d’ui seurté en rien ne voit,
Fors que peril par tout en general,
Car, chacun jour, meschiet il qui que soit. 273b
L’envoy
Princes, cilz doit bien Jhesucrist loer
Qui du jour puet son corps eschaper droit.
30 Je m’afolay hier la jambe a tumer :
Car, chascun jour, meschiet il qui que soit.
