Balade 671 : Entendéz ça, vous qui a court aléz (MXXXIII)
Autre Balade
― Entendéz ça, vous qui a court aléz,
Et qui avéz d’y frequenter desir :
Au commencier le sot saige feréz
Et aprenéz hardiment a mentir.
5 Branléz du les dont vous pouéz sentir
Qu’il vous pourra valoir aucunement.
Jouéz, juréz, demandéz hardiment
Et acordéz tout ce que l’en dira. 272c
S’ainsis faictes, tenéz certainement
10 Que grant proufit de la court vous venrra.
Soiéz hardis et par tout vous boutéz.
Mais penséz vous de nettement vestir.
S’il est mestier, a tout homme buvéz,
Et si penséz des plus grans poursuir,
15 De fort jangler tant qu’om vous viengne oir.
Ne vous chaille de parler saigement.
Poursuiéz fort et continuelment,
Sanz departir, et ce vous aidera
D’estat avoir, et si soudainement
20 Que grant proufit de la court vous venrra.
A toute heure hurtéz et gourmandéz,
Faictes a part a pluseurs enquerir
S’il eschiet rien, se nulz es enruméz
Ou vous puissiéz aucun don acquerir.
25 S[e] officier se puet laissier mourir,
Son office queréz diligemment
Et demandéz a tous communement,
Sanz honte avoir, qui donner vous voulra,
Et vous feréz, par tel gouvernement,
30 Que grant proufit de la court vous venrra.
L’envoy
Enfans de court, tous ces poins retenéz,
Et lors chascuns de vous persever[r]a[1]
En les faisant, se bien les maintenéz,
Que grant proufit de la court vous venrra.
[1] Saint Hilaire corrige en par soi verra
