Balade 670 : Je vous ayme. De quel amour, amis (MXXXII)
Balade
― Je vous ayme. ― De quel amour, amis ?
― De tel amour qu’om doit sa dame amer.
― Comme l’aime on ? ― L’en n’est pas ennemis,
Car on se doit baisier et acoler,
5 Joindre de prés doulcement, et celer
A toute gent le secret de nature.
La rent Amour sa joieuse pasture
Aux amoureux, c’est li savoureus dons
Que prandre en gré doit toute creature :
10 A dire voir, c’est pour quoy nous amons.
― Améz vous donc que vous soiéz honnis,
Pour vo dame vouloir deshonourer,
Et faictes vous difference ou devis 272b
Entre nulles pour leur honour garder ?
15 ― Oil. ― Comment ? ― Celles a marier
Fault espargnier, car pas n’ont couverture
Quant a honeur, si seroit grant laidure.
Mais des autres couvertes nous taisons,
Qui puelent bien d’amour porter la cure :
20 A dire voir, c’est pour quoy nous amons.
― Amours est donc saige, ce m’est advis,
Quant il veult loy entre femmes donner.
Mais Nature le souferroit envis
Qui a toutes vuelt son pouoir monstrer.
25 Amour ne voit, nulle n’en puet aler
Puis qu’elle sent l’amoureuse pointure,
Soit vierge ou non, tele est d’amour l’ardure
Qui se boute partout a reculons.
― Vous dittes bien, c’est tresdouce pasture[1] :
30 A dire voir, c’est pour quoy nous amons.
L’envoy
Prince[2], en amour tant de douçour figure
Que qui se puet bouter en sa jointure
Et il s’i scet bien aider des talons,
Il ne vouldroit ja autre nourreture
35 Pour ce delit trouver qui petit dure :
A dire voir, c’est pour quoy nous amons.
[1] Ms. pastoure
[2] Ms. Princes
