Balade 668 : Chascuns se prant a amander (MXXX)

Balade

                        Chascuns se prant a amander
                        Et se confesse, chascun jour.
                        En conseillant vont demander
                        Pluseurs argent a leur seigneur[1],
5                      Li grant, ly moien, li menour,
                        Soit a duc, a prince ou a roy,
                        Ne font que dire sanz sejour :
                        ― Sire, souviengne vous de moy.

                        Faictes mes lettres commander.
10                    Parléz au Flament en destour.
                        Vueilléz les generaulx mander
                        Que paiéz soye sanz retour.
                        Et l’autre dit pour le meillour :                                                           271d
                        ― De vos cofres, plus brief n’y voy.
15                    Chascun fait ainsi sa clamour :
                        ―Sire, souviengne vous de moy.

                        Par derrier la table au disner
                        Et a souper[2], vont a leur tour
                        Les compaignons, pour confesser
20                    L’un aprés l’autre, et font leur plour.
                        On les rassoult de leur folour.
                        Response ont souvent troy et troy,
                        Disans, partans, plains de dolour :
                        ― Sire, souviengne vous de moy.

                        L’envoy

25                    Prince, puisqu’om veult Dieu doubter
                        Et sa conscience ordonner,
                        Encore sera bonne la loy.
                        Chascuns va pour soy dolouser
                        Vers vous, en disant ce parler :
30                    ― Sire, souviengne vous de moy.

[1] Saint Hilaire corrige en seignour

[2] Ms. leur souper