Balade 667 : Eschançons, queux et escuiers tranchans (MXXIX)
Autre Balade
Eschançons, queux et escuiers tranchans,
Maistres d’ostelz, pannetiers, tous offices,
Huissiers d’armes et escuiers servans,
Sergens d’armes, ne soiéz plus si nices.
5 Departéz vous quant le roy disnera
Et tous autres, puis que cilz le dira
Qui ne veult pas qu’om face au roy assault
A son manger, ou mal vous en prendra :
Aléz disner, ce dit maistre Regnault,
10 Car vous estes trop la chambre eschaufans.
Saussiers, gardéz le roy de fors espices,
Faictes vergus d’osille, et vous, enfans,
Ne demandéz rost, brouet n’escrevices.
Cilz qui tranche tout vous refusera.
15 Le medicin le plat avoir vouldra
Pour mieulx sçavoir qu’il n’ait es queux deffault,
Ce mot orréz en sa chambre ou il va : 271c
Aléz disner, ce dit maistre Regnault.
C’est un dur mot aux compaignons galans
20 Qui de ce plat avoient benefices,
Le temps passé. Tristes sont et dolans
Qu’en un seul lieu est tourné li esclipces,
Mais, se Dieu plaist, li roys respassera,
Mais que li plas en pluseurs lieux luira
25 Com le souleil qui va puis bas, puis hault,
Tant que ce mot de tous poins cessera :
Aléz disner, ce dit maistre Regnault.
L’envoy
Prince, a Beauté tout le cuer me trembla
Quant j’entray enz et je vi crier la
30 A haulte voix : ― Vuidéz tous. Pour le chaut,
N’y demeure que cilz qui servira.
Quiere son mieulx qui trouver le pourra :
Aléz disner, ce dit maistre Regnault.
