Balade 665 : Chascuns ne fait que demander (MXXVII)

Autre Balade

                        Chascuns ne fait que demander :
                        ― Quel office as tu a la court ?
                        Lors respont : ― Je puis commander
                        A pluseurs qui me font le sourt.
5                      Mais un autre office m’y sourt
                        Que autres et tu bien congnois,
                        N’y a saige ne si lourt :
                        Quant on baille, je fais des crois.

                        Je puis bien venir sanz mander,
10                    Et sanz fourrier faire mon hourt.
                        On me fait a l’uis delivrer
                        Et en salle l’uissier acourt :
                        J’ay un boute hors brief et court,
                        Et du roy l’escaille des nois.
15                    Mon estat est, a quoy qu’il tourt,
                        Quant on faille, je faiz des crois.

                        Mains y voy venir et aler.
                        Quant l’un s’en fuit, l’autre y acourt.                                                 271a
                        Chascuns se cuide avant bouter.
20                    Mais Envie a pluseurs sus court.
                        L’un s’i pert, l’autre se ressourt.
                        Pour un perdu en revient trois,
                        C’est bon que mon estat demourt :
                        Quant on baille, je faiz des crois.

                        L’envoy

25                    Prince, a court puis bien demourer,
                        Grans est mes estas et adrois
                        Pour les ennemis rebouter :
                        Quant on baille, je faiz des crois.