Balade 664 : Dieu gart, dame. Dieu vous benie (MXXVI)

Balade

                        ― Dieu gart, dame. ― Dieu vous benie !
                        Que queréz vous ? ― Le nom d’ami.
                        ― De qui ? ― De vous. ― Ne l’arréz mie.
                        ― Pourquoy ? ― Pour ce que quant a mi,
5                      Oncques n’amay jour ne demi.
                        On dit qu’amour point plus que ronce.
                        ― Que dittes vous ? Las ! je langui :
                        Trop me faites dure responce.

                        Certes non fais, car ennemie
10                    Ne vous suy. ― Donc ay je l’octri
                        D’avoir nom d’ami, vous d’amie ?
                        ― Autrement va. ― Comment ? ― Ainsi
                        Que mal ne vous vueil, ne aussi
                        Amer, pour ce de vous m’esconse.
15                    ― Donc mourray je. Pour Dieu mercy !                                               270d
                        Trop me faittes dure responce.

                        Je ne vous quier nulle folie.
                        D’avoir nom d’ami vous suppli
                        De par vous. ― Ce seroit sotie
20                    De l’octroy. Nom d’amant vous dy.
                        Souffise vous. ― C’est un detry.
                        Mains est amant d’ami une once,
                        Mais au fort retien ce nom cy.
                        Trop me faictes dure responce.

                        L’envoy

25                    Dieux d’amours, je vous remercy.
                        ― De quoy ? ― Des corpiaux de vo tronce.
                        Dame, bien m’avéz asservi,
                        Trop me faictes dure responce.