Balade 663 : Lecervot, Peruche et Phillipe (MXXV)

Autre Balade

                        Lecervot, Peruche et Phillipe
                        Et Charlot, les .iiii., les trois
                        Sont une couple, et a la trippe
                        Scevent dancier aucune fois.
5                      C’est le jeusne conseil courtois
                        Qui metteront lance sur fautre.
                        Pour proye courront par les bois :
                        Ilz ne celent rien l’un a l’autre.

                        Quant l’un s’esjoit, l’autres[1] tripe.
10                    Ilz seront compaignons galois.
                        Se l’un grousse, l’autre defripe.
                        C’est tout un. Ces quatre François
                        Feront encor nouvelles loys                                                               270c
                        Et coucheront en divers pautre
15                    Et rachaceront en Valois :
                        Ilz ne celent rien l’un a l’autre.

                        Chascuns sera [en] male grippe
                        S’ilz treuvent les gens maucourtois.
                        Horion aront et dalippe
20                    Et useront de nouveaux drois.
                        Tel beste cherra en leurs roys
                        A qui ilz escourront son veaurre.
                        Car puis que leurs engins sont rois,
                        Ilz ne celent riens l’un a l’autre.

                        L’envoy

25                    Princes, ces .iiii. Hurepois
                        Cercheront d’un costé et d’autre
                        Mainte venoison sanz graspois :
                        Ilz ne celent riens l’un a l’autre.

[1] Ms. ly autres