Balade 662 : A vous, maistre d’ostel, me plain (MXXIV)
Balade
A vous, maistre d’ostel, me plain
Du ventre Jehan de Saint Symon,
Car il a fait son sac si plain
Que je n’ay jambes ne talon
5 Qui puist souffrir tel estalon
Ne moy porter. ― Et qui es tu ?
― Certes, je suis son graile cu,
Qui l’ay servi treslonguement.
Or est trop pesent devenu :
10 Faictes sur ce vo jugement.
Trop s’emplist, le soir et le main,
De char de buef et de mouton.
Toudis a le voirre en la main,
Tant boit qu’il en devient breton.
15 Perdriz n’est, connin ne chapon
Qui ne soit par lui retenu.
Il vole au gros et au menu,
Maint brouet chascun jour respant.
Du servir ne suis plus tenu :
20 Faictes sur ce vo jugement. 270b
Il semble que je soye un nain
Au regart du ventre felon.
De sa courroie me complain,
De sa tasse et de la façon.
25 Le martel semble d’un maçon.
Son poys me fait estre bossu,
Et je ne suy pas si fessu
Que je fu anciennement.
Plus ne vueil servir tel pensu :
30 Faictes sur ce vo jugement.
L’envoy
Maistres d’ostel, je suis perdu
Se par vous ne suis secouru.
Je ne puis durer longuement.
Faictes jeuner ce malistru,
35 Donnéz lui eaue et orge cru :
Faictes sur ce vo jugement.
