Balade 661 : Chascuns parle de chevance acquerir (MXXIII)

Autre Balade

                        Chascuns parle de chevance acquerir,
                        D’avoir estat, puissance et renommee,
                        Qu’om se voye de pluseurs requerir,
                        Qu’om ait honeur qui tant est desiree :
5                      C’est tout triboul et labour de pensee.
                        Je ne vueil rien au cuer qui me desplaise,
                        Mais en passant de journee en journee,
                        Il me souffist que je soye bien aise.

                        Des faiz de nul ne vueil ja enquerir,
10                    Ne d’autruy biens avoir la teste emflee,
                        Ne moy tuer pour terre conquerir.
                        Si riche n’est qui ait que sa ventr’e !
                        Pour sens avoir ne vueil langue doree,
                        Ne pour honeur tant soufrir de mesaise.
15                    Tous telz estas n’est que vent et humee :
                        Il me souffist que je soie bien aise.

                        Ne sçay je bien qu’il fault chascun mourir ?
                        Sanz espargnier personne qui soit nee,
                        Nature fait tout homme a mort courir.
20                    C’est sanz rappel, par sentence ordonnee.
                        Pour quoy est donc vie desordonnee.                                              270a
                        Pour acquerir la chevance mauvaise ?
                        Fy de l’avoir et richesce emmuree !
                        Il me souffist que je soye bien aise.

                        L’envoy

25                    Prince, on se doit en ce monde esjouir,
                        Garder la loy, a Dieu faire plaisir
                        Sanz convoiter ne faire euvre punaise.
                        Qu’om face bien, et se doit on tenir
                        A ce qu’om a, et pour vray soustenir :
30                    Il me souffist que je soye bien aise.