Balade 659 : Qui vivre veult sanz grant peril avoir (MXXI)
Autre Balade
Qui vivre veult sanz grant peril avoir,
Pour eschiver de ce monde l’envie,
L’estat de court doit fuir et sçavoir 269b
Que sur tous est la plus doubteuse vie
5 D’ame et de corps, et foulz est qui s’i fie,
Car Fortune tient illec sa maison.
Regner un temps, languir l’autre saison
Y voit on maint, cheoir soudainement
De hault au bas. Pour quoy ne la fuit on ?
10 Pour ce que foul ne doubte jusqu’il prant.
Justice aprés ne doit garder vouloir,
Au temps qui court, nul qui ait prodommie,
Car les mauvais qui des vices sont hoir
La heent touz, ami n’a ne amie.
15 Enfans servir ne vous conseille mie,
Femme et commun, car pou ont de raison,
Leur amour fault a petit d’achoison,
Si qu’om y pert temps et aage souvent :
Mais nul n’y a consideracion,
20 Pour ce que foul ne doubte jusqu’il prant.
Terre d’autruy ne deniers recevoir,
Estre trop pres de haulte seignourie,
Ne grant estat qui fait adecepvoir
Maint dolent cuer, nul ne s’i glorifie.
25 Vif de ton art, doubte Dieu et gracie,
Souffise toy rente ou possession
Moiennement, et ne fay desraison
A homme nul. Maintien toy humblement :
Car aux mauvais vendra pugnicion,
30 Pour ce que foul ne doubte jusqu’il prant.
L’envoy
Prince, je voy grant desolacion,
Baras couvers, dissimulation,
Envie, orgueil, convoitise d’argent
Regner par tout, et dominacion 269c
35 Branler tresfort sur sa mutacion,
Pour ce que foul ne doubte jusqu’il prant.
