Balade 81bis : Puis que je voy né le filz de l’enfant (MXX)

Autre Balade[1]

                        Puis que je voy né le filz de l’enfant,
                        Selon les diz et exposicions
                        Des Prophetes et Sebile qui sent
                        Par esperit les grans evencions,                                                        269a
5                      De ce monde les tribulacions
                        Doivent fenir, et soubz le petit né
                        Doit reflourir saincte religions,
                        Qu’ainsi est il pieça predestiné.

                        Fleur qui de fleur pure et nette descent
10                    Sera de Dieu la vraie elections,
                        Qui doit porter son ceptre en Orient,
                        Du remanent des persecucions,
                        Du regne saint la consecracions.
                        Jherusalem, la sera couronné
15                    Et soubzmettra payennes nascions :
                        Qu’ainsi est il pieça predestiné.

                        O lui sera un saint pappe Innocent,
                        Et soubz ces deux la reformacions
                        Des crestiens sera fort et puissant,
20                    Crainte la loy, et les discencions
                        N’aront plus lieu. Or nous esjouissons
                        Car asséz tost seront no mal finé,
                        Les grans pecheurs et leurs intencions :
                        Qu’ainsi est il pieça predestiné.

                        L’envoy

25                    Prince, je voy le nom du nom naiscent,
                        Et l’innocent de l’innocent crié
                        Qui doit regner sire sur mainte gent.
                        Qu’ainsi est il pieça predestiné.

[1] Pièce identique au f° 19 sous le n° LXXXI