Balade 658 : Congnoissance, Sens, Honeur ne Memoire (MXIX)

Autre Balade

                        Congnoissance, Sens, Honeur ne Memoire
                        N’ont au jour d’ui leur temps ne leur saison :
                        Convoitise regne avec VaineGloire,
                        Desloyaulté, Envie et Traison,                                                           268d
5                      Et Volunté qui regne en desraison.
                        Pitié n’a lieu et Charité est morte,
                        Justice, Loy se perdent et Raison :
                        Tout se destruit, riens n’est qui me conforte.

                        Car nul ne veult bonne parole croire,
10                    Ne je ne voy, ne croy qu’il soit mais hom
                        Qui vueille oyr parler de chose voire
                        Fors que de mal, mais encore se moque on.
                        S’aucuns dit bien : ― C’est un maistre Remon.
                        Grant dommaige est quant la chape ne porte !
15                    Mais chascun fait prodomme d’un larron :
                        Tout se destruit, n’est rien[1] qui me conforte.

                        Et quant je voy toutes vertus recroire
                        Et tous vices regner [si] a bandon,
                        Je tien de voir ne je n’ose mescroire
20                    Qu’il ne viengne grant tribulacion,
                        Mortalité, guerre et perdicion
                        De la princé qui a telz maulx s’assorte.
                        Prochainement, c’est ma conclusion,
                        Tout se destruit, [rien n’est qui me conforte.]

                        L’envoy

25                    Prince qui veult avoit dominion
                        Doit doubter Dieu, es vertuz se deporte,
                        Car s’il fait mal, c’est ma conclusion :
                        Tout se destruit, n’est rien[2] qui me conforte.

[1] Saint Hilaire corrige en rien n’est

[2] Saint Hilaire corrige en rien n’est