Balade 657 : Ne doit chaloir a homme qui sens a (MXVIII)

Balade

                        Ne doit chaloir a homme qui sens a
                        Et qui scet art d’estat royal suir,
                        Car li riches com li povres mourra,                                                    268c
                        Et si fait bon sa franchise ensuir.
5                      Qui sert a court il ne fait que fuir
                        Puis ça, puis la, et vit a grant dangier :
                        […][1]
                        Il fait trop bon son pain en paix mangier.

                        Cilz qui art scet par jour en ouvrera.
10                    Qui saiges est, son sens le doit chevir.
                        Se il a propre, il s’en gouvernera
                        Et chascun d’eulx se pourra enrrichir,
                        Sanz grant pechié reposer et dormir
                        Quant nuit sera, sanz son estat changer
15                    Et sanz debat. Pour ce vueil soustenir :
                        Il fait trop bon son pain en paix mangier.

                        S’il vit a court, sa vie abregera.
                        Car comme serf fault aler et venir,
                        Matin lever et [a] tart se couchier,
20                    Et si le fault parjurer et mentir,
                        Trair derrier et pardevant blandir.
                        Estre flateur, traitre, losengier.
                        Pour ce conclus et puis bien maintenir :
                        Il fait trop bon son pain en paix mangier.

                        L’envoy

25                    Prince, qui a pour son corps soustenir,
                        Sanz trop ne pou, doit la court estrangier,
                        Car Salemon tesmoingne et veult tenir :
                        Il fait trop bon son pain en paix mangier.

[1] Vers manquant