Balade 651 : Entre les biens et graces de nature (MVIII)

Balade amoureuse

                        Entre les biens et graces de nature
                        Que dame puet avoir et desirer
                        Pour bon renom et pour honour qui dure,
                        Qui exemple doit par tout demourer,
5                      Vous puet on bien d’un chapel couronner
                        A .iiii. flours, qui maint grief mal acoise,
                        Qui sont en vous pour chascun honourer,
                        Bonne et belle, gracieuse et courtoise.

                        Car de bonté vient bonne creature
10                    Qui dame fait en tous biens renommer.
                        Et la beauté fait sa douce figure
                        Par doulz regart de toutes gens loer.
                        Gracieuse fait de sa grace amer
                        Le nom de li et le corps ou qu’il voise.
15                    Courtoisie la fait par tout clamer
                        Bonne et belle, gracieuse et courtoise.

                        Ces .iiii. fleurs sont toudis en verdure,
                        Qui font le corps d’une dame parer
                        Et contenir en tous biens, et si pure
20                    Que mesdisans ne la peuent grever.
                        Pechié ne puet nullement demourer
                        Ou ces flours sont, ne faire assault ne noise
                        A vous, dame, que chascuns doit nommer
                        Bonne et belle, gracieuse et courtoise.

                        L’envoy

25                    Tresdouce flour, mon tresor et ma cure,                                          265b
                        Tout mon desir et ce qui me renvoise,
                        Dire m’esjoist, et m’est douce pasture,
                        Bonne et belle, gracieuse et courtoise.