Balade 292bis : Se ceulx qui ont segnorie a garder (MVI)
Autre Balade[1]
Se ceulx qui ont segnorie a garder
Savoient bien que c’est d’obeissance,
Et comment roys se doit faire doubter
Et en tous cas tenir son ordonnance,
5 L’en pugniroit tant desobeissance
Qu’a tousjours mais en seroit mencion.
Car obeir fait dominacion.
Desobeir seignorie destruit
Et maint pays en sont de seigneur vuit,
10 Qui des subgés n’ont rebouté tel vice :
Or y pensent seigneurs, dames et tuit :
Durer ne peut royaume sans justice.
Mais au jour d’ui, qui bien veult regarder
Ceulx que prince lieve hault et avance,
15 En pluseurs lieux ceulz verréz regiber
Contre son droit, faire grant desplaisance
A ses subgés, appliquer par puissance
Ce qui leur n’est par leur presumpcion.
Par tel seigneur sont en elacion.
20 S’un justicier en parle, trop lui nuit.
Lors pert prince son demaine qui fuit,
Par son deffault son souverain office,
Quant ne soustient ce qui son droit conduit :
Durer ne peut royaume sans justice.
25 Pour ce sur tous doivent princes dampner
Ceulx qui ont fais, qui, soubz grace et fiance
De leur amour, veulent leurs gens fouler,
Leur droit tolir, exurper leur chevance.
Ingrades sont, et ceste decevance
30 Ne doit avoir nulle remission.
En ce cas soit faite pugnicion,
Tant qu’a telz maulx ne soit nul homme instruit. 264c
Caz eschaudéz craint eaue jour et nuit.
Si fait mauvés, s’il est qui le pugnice,
35 Paine et tourment : aviséz cy trestuit :
Durer ne peut royaume sanz justice.
L’envoy
Prince, qui veult selon les loys regner,
Il doit les bons sur toute chose amer,
Et au mauvais, felons, plains de malice,
40 Pugnicion en publique donner,
Ou autrement se voit desheriter :
Durer ne peut royayme sanz justice.
[1] Pièce identique au f° 65 sous le numéro CCXCVI. Saint Hilaire supplée Comment tous roys et princes se doivent faire doubter et obeir en tous cas, d’après le texte de CCXCVI.
