Balade 650 : Moult sont les loys et les drois bestournés (MV)
Autre Balade
Moult sont les loys et les drois bestournés,
Les gens aussi et leurs condicions
Et les bons temps et usages mués 264a
Entre mauvais, entre les nacions,
5 Car l’en ne voit fors que divisions
Entre les grans, les moyens et les bas,
Guerres mouvoir, procés, plais et debas,
Sans craindre Dieu ne amer son prochain,
Decepcion et faulte en tous estas :
10 Justice fault, loy et honneur, a plain.
Les viellars sont des jones deprimés,
Sages des folz ont les oppressions,
Povres ont tort, riches sont eslevés,
Mauvais vivent, bons ont pugnicions,
15 Vices regnent[1] et dissolucions,
Pechiéz de corps et convoitise, helas !
Entre les roys, les pueples, les prelas.
Se vendent dons, bon clerc traveille en vain,
Preudoms aussi des biens mondains sont cas :
20 Justice fault, loy et honneur, a plain.
Par gens d’armes est li pueples robés.
Es priorés et es religions,
Es maisons Dieu vont prendre leur hostelz,
Es bours du roy, es advocacions
25 Et aux juges gardans juridicions.
De ces troys cy quierent chevaux et draps
Plus que d’autres. Leurs bons amis font cas.
Et leur tollent char, vin, fourrage et pain.
Aux ennemis telz explois ne font pas :
30 Justice fault, loy et honneur, a plain.
L’envoy
Prince, nulz homs n’est contre mort arméz,
Viéz pechié nuyt et Diex est enforméz
De nos meffaiz, vray juge et souverain,
Auquel pugnir est par lui reservéz.
35 Trop me merveil que mondéz n’est dampnéz.
Justice fault, loy et honneur a plain. 264b
[1] Ms. regnes
