Balade 649 : Trop vigne avoir et maisons en village (MIV)
Autre Balade
Trop vigne avoir et maisons en village,
Filles aussi qui sont a marier,
N’est pas grant gaing ne seur heritage.
Es vignes fault tousjours argent ballier,
5 Et es maisons fault toudis charpenter,
Couvreur, masson, late, clo, couverture,
Et sont toudiz d’ardoir en aventure.
Nulz n’y gaigne, tant ait teste subtille,
Et les enfans sont de male nature : 263d
10 Aise sont ceulz qui n’ont ne filz ne fille.
Car qui les a, tenir fault grant mesnage,
Nourrice avoir, oyr braire et crier,
Vestir, chaucier, pain, vin, lait et fromage,
Buche, charbon, paint et char pour mengier,
15 Chambres et lis, drapeaux, linge a couchier,
Bers a bercier, et sentir leur ordure,
Six ou sept ans que ceste dance dure :
Qui enfans a ne lui fault autre estrille.
Ja bien n’aura fors que malaventure :
20 Aise sont ceulx qui n’ont ne filz ne fille.
Et s’ilz sont grans, art leur fault et usage,
Science avoir, apprendre, estudier,
Et aux filles convient en mariage
Terre et argent et grant meuble chargier.
25 S’ilz sont mauvais, on en meurt de legier,
Et s’ilz sont bons, c’est pour eulz, et n’ont cure
De leur pere ne mere, mais procure
Chascun le leur et a champ et a ville
En souhaidant tousjours leur sepulture :
30 Aise sont ceulx qui n’ont [ne] filz ne fille.
L’envoy
Pere et mere, qui tant avés de rage
D’enfans nourrir, s’ilz sont grans soyés sage
Et gardés bien que nulz d’eulz ne vous pille.
Soyés seigneurs ou vous arés dommage.
35 Ne vous rendés a vie n’a minage.
Aise sont ceulx qui n’ont [ne] filz ne fille.
