Balade 648 : O comme grant est la gloire des roys (MIII)
Autre Balade de la gloire des roys
O comme grant est la gloire des roys
Et des princes, qui ont commandement
Sur les pueples, qui font craindre leurs vois
Et leurs edics tenir estroitement,
5 Jugans autruy, et voluntairement,
Et qui ont tout ce qu’ilz vuelent avoir,
Fors jour certain, ce ne peuent savoir,
De leurs vies, maiz certains sont de mort.
Ce les doyt moult a bien faire esmouvoir :
10 Qui ne craint Dieu et justice, il a tort.
Ne sueffrent ilz et les chaus et les frois ?
N’ont ilz paour ? n’ont ilz point et tourment
De gouverner ? ne sont ilz pas destrois
Pour aucuns maulx venans soudainement,
15 N’ont ilz esté pris anciennement, 263c
Mors et occis, pouoir contre pouoir,
En guerroyant ? S’ilz n’ont fait leur devoir
Et qu’avec Dieu n’ayent eu bon accort,
Lors les soubzmist. Par ce peut l’en veoir :
20 Qui ne craint Dieu et justice, il a tort.
De droit royer sont dit selon les loys
Et de mener le peuple justement,
L’Eglize amer, rendre a chascun ses drois,
Grace et pitié, rigoreux jugement
25 Selon les cas, et s’ilz font autrement,
Sans repentir, bien y scet pourveoir
Le souverain, et s’ilz font leur devoir,
Grant merite ont. Diex fait leur regne fort.
Et quant sur tous volt vengence asseoir,
30 Qui ne craint Dieu et justice, il a tort.
L’envoy
Prince, les roys qui ont gouvernement
Sont vicaires de Dieu mondainement,
Craindre et servir le doivent a effort
Car de lui seul tiennent leur tenement.
35 Et quant pugnir peut tout en un moment,
Qui ne craint Dieu et justice, il a tort.
