Balade 647 : Ou tous les dix de l’escripture sainte (MII)
Autre Balade
En[1] tous les dis de l’escripture sainte,
De l’ancien et nouvel testament,
Seront confus, et la parole fainte
Des prophetes par qui Dieu proprement
5 Parla des faiz et de l’advenement
Qui sur la fin du monde doit venir,
Ou il faura mauvaisement fenir
Les gens pecheurs, faux, ravisseurs, mauvais,
Perseverens. Ce devons nous tenir :
10 Cryons mercy, demandons grace et paix !
Car en tous lieux est charité estainte
Qui maint en Dieu, et Diec maint ensement
En charité. Pitié fait sa complainte,
Humilité, honneur semblablement,
15 Amour n’a lieu, ne vertueusement
Ne se veult nulz selon Dieu maintenir.
Es trois estas n’a homme souvenir,
Soit clers, nobles, prestres, chevalier, layz,
De l’ire Dieu jusqu’il s’en voit ferir :
20 Crions mercy, demandons grace et paix ! 263b
Quant pour pechier est pugni maint et mainte
Sans espargnier nul terriennement,
Roy, prince, duc, tant ait espee sainte,
Povre, riche, de grant gouvernement
25 Ne de petit, pour quoy mauvaisement
Veult le plus fort au plus feble tolir,
N’est preste mort pour eulz a coup ferir
Soudainement, pour leurs horrigle faiz ?
Oyl, par Dieu, tous nous convient mourir :
30 Crions mercy, demandons[2] grace et paix !
L’envoy
Prince, pour Dieu, vueilliés bien advertir
En tous estas d’amer dieu et cremir
Et d’amender no vie desormais
Sans faire tort, sans prendre et sans ravir
35 Les biens d’autruy, et qu’il nous daigne oyr :
Crions mercy, demandons grace et paix !
[1] Saint Hilaire corrige en Ou
[2] Ms. et demandons
