Balade 646 : Endemantiers que mon maistre aprenoit (MI)

Autre Balade

                        Endemantiers que mon maistre aprenoit,
                        Qui est sires et conte de Valoys,
                        Treshumblement me dit que il vouloit
                        Que je feisse aucun bien a son choys.
5                      Lors obey et dis que c’estoit drois
                        Et fis ainsy. Que nulz ne puet mesprendre,
                        Soit ducs, contes, princes, chevaliers, roys,
                        Qui en tout temps ne doye bien apprendre.

                        Car qui aprent et retient, on le voit
10                    Sage et puissant, il en[1] est plus adrois,
                        Et se garde que nulz ne le deçoit.
                        Le cry en a de son pueple et la voix,
                        Il aime Dieu, il en est plus adrois
                        Et doyt souffrir c’on le doye reprendre
15                    Quant il mesprent. Il n’est nul a la foys
                        Qui en tout temps ne doye bien apprendre.

                        Roy sanz lettres comme un asne seroit                                            263a
                        S’il ne sçavoit l’escripture ou les loys,
                        Chascun de ly par tout se moqueroit.
20                    Thiés doivent savoir, latin, françoys
                        Pour miex garder leurs pas et leur destrois
                        Et sagement a chascun raison rendre :
                        Aprenés donc, si chaut n’est ne si frois,
                        Que en tout temps ne doye bien apprendre.

                        L’envoy

25                    Princes, pensés que qui bien aprendroit,
                        En aprenant pourroit vices reprendre,
                        Dont n’est il nul, se ces poins advisoit,
                        Qui en tout temps ne doye bien aprendre.

[1] Ms. sen