Balade 644 : Chascun se plaint, chascun ordonne (DCCCCXCIX)

Autre Balade

                        Chascun se plaint, chascun ordonne
                        Sur ce que Diex a ordonné.
                        Li uns dit, quant il pluet ou tonne :
                        ― Que n’a Diex li biau temps donné ?
5                      Las ! C’est trop pleu et trop tonné !
                        Si fait chaut, ou souhaide froit.
                        Pour quoy est on si mal sené ?
                        Ancor est Dieu ou il souloit.

                        L’un dit quant une cloche sonne :
10                    ― Ne sera ce jamais sonné ?
                        S’un autre charpente ou massonne,
                        Assés en sera sermonné.
                        Il n’est homme de mere né                                                                 262c
                        Qui il souffise ce qu’il voit
15                    Ne qui ait bien ymaginé :
                        Ancor est Diex ou il souloit,

                        Qui ses biens par tout habandonne,
                        Et de pluseurs est indigné,
                        Pourveent a toute personne,
20                    Qui tost a le lait temps finé,
                        Les biens, le soleil ramené,
                        Et qui en tous cas nous pourvoit.
                        Souffrons ce qu’il a destiné :
                        Ancor est Dieu ou il souloit.

                        L’envoy

25                    Princes, chascun veult mettre bonne
                        Aux œuvres de cil qui tout voit.
                        C’est pechiéz, sa justice est bonne :
                        Ancor est Dieu ou il souloit.