Balade 643 : Tristesse, orgueil, envie et traison (DCCCXCVIII)

Autre Balade

                        Tristesse, orgueil, envie et traison,
                        Avarice, faulx semblant et peresse,
                        Menterie, dissimulacion
                        Et lacheté, faintise larronnesse,
5                      Il est trop folz qui point regner vous lesse,
                        Car par vous sont maintz royaumes peris,
                        Les noms perdus d’onneur et de noblesce :
                        Par vous s’en est tout li bon temps fuis.

                        Trop longuement avés eu vo saison
10                    Et ce monde tenu en grant destresse
                        Sans joye avoir, sans consolacion                                                     262b
                        Donner aux hons, c’est ce qui trop me blesse.
                        Or vuidiés hors, gent faulse et felonnesse.
                        Je vous feray jouer aux esbahis,
15                    Et revendra honneur et gentilesce :
                        Par vous s’en est tout li bon temps fuis.

                        Je ramenray verité et raison,
                        Amour, deduis, loyauté et largesce,
                        Pitié, douceur, remuneracion,
20                    Chasser, voler, jouster et hardiesse,
                        Corner, chanter, dansser et la druesse
                        D’amours qui fait conquerre maintz pays.
                        Fuyés vous ent, vuidiés de ma fortresse,
                        Par vous s’en est tout li bon temps fuis.

                        L’envoy

25                    Princes, ayés droituriere maison,
                        Soyés humbles, preux, courtois et hardis,
                        Tant que nulz homs n’ait de dire achoison :
                        Par vous s’en est tout li bon temps fuis.