Balade 642 : Je voy souvent crier Noé (DCCCCXCVII)

Autre Balade

                        Je voy souvent crier Noé,
                        Et si le crie on tant qu’il vient,
                        Maiz le bon temps est esbloé
                        Car a maintes gens n’en[1] souvient,
5                      Et si ne sçay a quoy il tient
                        Qu’il ne vient quant chascun l’escrie,
                        En disant : ― Las ! qui te retient,
                        Bon temps ? ne revendras tu mie ?

                        Revien[2], tu as trop demouré,                                                              262a
10                    Necessairement le convient,
                        Et nous seron tuit recouvré :
                        Cilz mondes trop chetif devient.
                        Il n’est que dueil, c’est tout nient :
                        Ramaine nous joyeuse vie,
15                    Chascuns te plaint et va crient :
                        Bon temps, ne revendras tu mie ?
                       
                        Ramaine largesce et planté,
                        Paix et amour qu’orgueil detient.
                        Avarice a tout surmonté,
20                    Toute male fortune avient,
                        A l’un de l’autre ne souvient.
                        Fay cesser mesdit et envye.
                        Vien, quant l’en te va tant prient,
                        Bon temps, ne revendras tu mie ?"

                        L’envoy

25                    Prince, pour vous est destiné
                        Ce bon temps, ne l’oubliés mie
                        Ou je crieray com forsené :
                        « Bon temps, ne revendras tu mie ? »

[1] Ms. de

[2] Ms. iCe vien