Balade 641 : Cilz qui veult paix et vivre en mariage (DCCCCXCVI)

Autre Balade

                        Cilz qui veult paix et vivre en mariage                                              261d
                        Ne doit trop hault ne trop bas regarder,
                        Trop jone avoir ne trop vielle en mesnage.
                        Prengne femme qui sache gouverner,
5                      D’age moyen, qui puist enfans porter.
                        Ainsy pourra mener joyeuse vie
                        Sans trop querir, sans trop bas assener :
                        Sages est cilz qui ainsy se marie.

                        En trop hault lieu a trop grant seignorage,
10                    Charge d’amis, puis c’on ne prent son per
                        Et ramentoit le plus grant son lignange,
                        Si ne peut on bonne vie mener.
                        Amour ne veult ne ne doit dominer.
                        Qui povre prent, s’il n’est riche, il mendie.
15                    Si se fait bon ou moyen ordonner :
                        Sagez est cilz qui ainsy se marie.

                        Qui vielle prent, se jone est, il enrage :
                        Deux contraires ne se puellent amer.
                        Si va ailleurs. Pis vault que bordelage,
20                    Se trop jone a, il ne fait que penser,
                        Maistresse fault pour la duire et garder.
                        Pour ce ou moyen vueil mettre m’estudie
                        Pour hoirs avoir, pour vivre et pour regner :
                        Sagez est cilz qui ainsy se marie.