Balade 640 : Ou temps jadis quant honneur commença (DCCCCXCV)
Autre Balade
Ou temps jadis quant honneur commença,
Vertus estoit et vaillance cherie,
Nulz clers adonc fausseté ne pensa,
Ne lascheté n’ot en chevalerie.
5 Largesce fu, la loy ot seignorie, 261c
Congnoissance fu es princes et roys,
Amour regna, li peuple fu courtois,
Pugny furent li felon duremet :
Autrement va, dont je suy tout destrois :
10 Car nul ne veult fors que parler d’argent.
Alés par tout : qui bien garde y prendra,
On ne parle fors de bareterie,
De demander et deça et dela
Du bien d’autruy, faire chiere marrie,
15 Argent querir, c’est convoiteuse vie,
Et les clers sont corrompus les loys.
Amour n’a lieu qui fist les cuers adrois
Et conquerir terre anciennement :
Convoitise gouverne, et tu le vois,
20 Car nulz ne veult fors que parler d’argent.
―Hari ! fait l’un. Et quant, deable, vendra
Le tresorier ? ne me payera il mie ?
L’autre respont : ― Je croy que si fera,
Maiz nous n’aron no paye que demie.
25 Nulz ne parle ne d’amer ne d’amie,
Fors de[1] exploitier finance a toutes fois.
Danser, chanter, n’est pas bien a son mois,
Vaillance va petit entre la gent.
Uns mondes queurt ou je ne me congnois,
30 Car nulz ne veult fors que parler d’argent.
L’envoy
Prince, ostés nous avarice et envie,
Reviengne amour, deduit, esbatement,
Joye et plaisir, honneur et courtoisie,
Car nulz ne veult fors que parler d’argent.
[1] Saint Hilaire corrige en d’
