Balade 639 : Se vous estes biaux, riches et joliz (DCCCCXCIV)

Autre Balade

                        Se vous estes biaux, riches et joliz,
                        Sages, apers, fourrés et bien vestuz,
                        Ne desprisés ja vos povres amis.                                                       261b
                        En courage sont les nobles vertus :
5                      Telz est au champs ou en la ville nus,
                        En povre habit, qui a plus hault courage
                        Et qui s’est miex en honneur maintenus
                        Que telz porte l’abit de hault parage.

                        La noblesce souveraine jadis
10                    Et de present est li cueur revestus
                        De bonnes meurs et de gracieux dis,
                        Et qui tousjours se tient et est tenus.
                        Cuer orgueilleux est hais et perdus,
                        Car Dieu le het, ce n’est nul vasselage.
15                    Humble cuer est plus de Dieu soustenus
                        Que telz porte l’abit de fault parage.

                        Qui plus est grant, plus doit estre amolis
                        Quant il se voit des biens de Dieu repus,
                        Les povres gens ne doit avoir despis
20                    Ne ses parens, mais je dy et conclus
                        Qu’aidier leur doit en tant comme il puet plus,
                        Car le povre oyt Diex de son hault estage,
                        Plus l’exsausse pour son bien la dessus
                        Que telz porte l’abit de hault parage.

                        L’envoy

25                    Prince, nulz homs ne doit pour ses habis
                        Gens despiter, dire ne faire oultrage.
                        Plus vault souvent li homs povrez, mendis,
                        Que telz porte l’abit de hault parage.