Balade 638 : Maiz qu’uns homs soit bien vestus et forrés (DCCCCXCIII)

Balade comment on honoure au jour d’ui plus l’abit que le porteur d’icellui

                        Maiz qu’uns homs soit bien vestus et forrés
                        Et qu’i sache faire une petit le grant,
                        Croler le front, et qu’il ait a un lez
                        Aucun qui soit ainsy que son servant,
5                      On ly dira : ― Sires, passés avant.
                        Pour son habit, et c’est ce qui me tue,
                        Ou il ne scet souventesfois neant
                        Ne plus que fait une buche vestue.

                        Ainsy fait on souvent des menestrés :
10                    Pour leurs habis les vont maint honorant.
                        Povre varlet sont souvent appellés
                        Gentil homme, ce font leur garnement.
                        Un mal vestu est appellé truant.
                        Nul ordre n’est au monde a droit tenue.
15                    Ne me congnois en cest siecle a present
                        Ne plus que fait une buche vestue.

                        Les vertueux ne sont point honorés
                        Ne ceulx qui vont simple estat demenant,
                        Ains sont toudis de maintes gens moqués
20                    Et par ce va tout anientissant,
                        Li ancien veulent faire l’enfant.
                        De jour en jour tout se change et remue,
                        Nulz de ses maulx ne s’advise ou[1] reprent
                        Ne plus que fait une buche vestue.

[1] Ms. ne