Balade 637 : Chascuns desire a avoir grant estat (DCCCCXCII)
Autre Balade [260d] sur les granz estaz
Chascuns desire a avoir grant estat,
En convoitant argent, or et finance,
Servir aux roys. L’un veult estre advocat,
Des requestes veult l’autre avoir puissance,
5 L’un conseillier, l’autre marchal de France,
L’un tresorier et l’autre general,
L’un evesque, l’autre estre cardinal,
L’un chancelier, l’autre estre souverains.
A leurs pourchas quierent trestous leur mal :
10 Es grans cours n’a siege qui soit certains.
Pour les tenir se muevent maint debat,
Et par faveur, sans eslire ordonnance.
A les avoir symonie s’embat,
Petit y vault sens ne experience,
15 Bonté de corps, prouesse ne vaillance.
Maiz qui miex miex tire au plus hault cheval,
L’un est bailli et l’autre est seneschal,
Et quant plus sont es grans estas hautains,
Envye ou mort les tumbent contreval :
20 Es grans cours na siege qui soit certains.
Lors en cheant sont douloreux et mat,
Car les aucuns perdent corps et chevance,
Autre bon nom dont nulz ne se combat,
Puis languissent, ferus d’impacience.
25 Grant richesse est [que] d’avoir souffisance,
Servir a Dieu, tenir moyen egal,
Non desirer d’estre trop curial,
Dont les sieges sont de grans pechiés plains.
Vivre du sien, estre sain et loyal :
30 Es grans cours n’a siegese qui soit certains.
L’envoy
Prince, eureux est qui aprent des s’enfance
A servir Dieu et aucun art des mains 261a
Pour soy chevir et vivre a sa plaisance :
Es grans cours n’a siege qui soit certains.
