Balade 636 : Nulz homs ne se doit esbahir (DCCCCXCI)
Balade comment nulz homs ne se doit esbahir de chose qu’il voye
Nulz homs ne se doit esbahir
Du temps ne de chose qu’il voye,
Ne soy donner courrous, n’air,
Fors que d’aler la droite voie, 260c
5 Qu’il face bien et qu’il s’esjoie,
Tiengne en tous estas le moien,
Et ne se loye a fol loyen,
Ne die blasme de nulluy :
Des choses du monde n’est rien,
10 Tout fu et tout sera autrui.
Cayn envieux voult mourdrir
Abel le juste, et toutevoie
Furent freres : quel desplaisir
Quant des filz d’Adam l’un desvoye
15 Tant que la terre vierge ordoye !
En ce premier aage ancien
Du sanc Abel, Assirien
Firent un lonc regne, ce truy,
Et le perdirent au derrien :
20 Tout fu et tout sera autruy.
Ne volt l’eaue terre envayr
Au temps Noe, tant que tout noye ?
Ne volt Troye Eneas trahir,
Qui les Griex y mist pour monnoye ?
25 Ne mit tout Alixandre en proye
Par guerre le monde et li sien ?
Li un font mal, li autre bien.
Nulz ne se doyt donner anuy
Des gens du temps. Note et retien :
30 Tout fu et tout sera autruy.
L’envoy
Prince, plaise vous souvenir
De loy et justice tenir
Qui en mains lieux fault au jour d’uy,
Riche et povre faura mourir,
35 Ne nous dampnons pour acquerir :
Tout fu et tout sera autrui.
