Balade 635 : J’amay jadis de tresparfaite amour (DCCCCXC)
Balade de l’amour que homme a a jeunesce
J’amay jadis de tresparfaite amour,
Comme ignorens, l’enfance de jonesse.
Pour sa beauté couverte de douçour
Et pour l’espoir de sa haulte noblesce
5 Qui par semblant a tout honneur s’adresce
Mis la mon cuer, mon corps, ce que j’avoye,
Et la servi le miex que je savoie
Si que par droit ne me deust oubvlier
En son aage, maiz trop me decevoie :
10 En jeusne amour ne se doit nul fier, 260b
Car en ce temps dangereux, plain de plour,
De voulenté muable qui trop blesse,
Ay moult souffert de poine et de labour,
Obeissans, et lors me fist promesse
15 Plaisant Folour de moy donner leesse,
Quant celle amour en son estat verroye
Que nulz n’ama ou temps que la servoye,
Car lors ne pot lier ne deslier.
S’oublié m’a, pour quoy donc ne diroye :
20 En jone amour ne se doit nul fier ?
Qui ne conçoit ne recorde en sa flour
Son doulz servent, maiz pour autre le lesse
Qui ne servi onques heure ne jour,
Tele enfance est perilleuse fortresse[1].
25 Moyenne amour est plus seure maistresse,
A tous servans miex la conseilleroye
Pour bon guerdon[2] que l’autre ne feroye
Ou chascun pert sens, temps et travellier,
Comme j’ay fait, chascun ce note et voye :
30 En jone amour ne se doyt nul fier.
L’envoy
Prince, je tien, puis qu’enfance foloye,
Que cilz est folz qui s’i croyt ne aloye
Et qui la sert, s’ailleurs peut adrecier,
Car le bien fait remunerer devoye.
35 S’en dy ce mot que dire ne souloye :
Et jone amour ne se doit nul fier.
[1] Ms. forteresse
[2] Ms. guerredon
