Balade 634 : Las ! Je ne sçay que ce puet estre (DCCCCLXXXIX)
Autre Balade
Las ! Je ne sçay que ce puet estre
Ne dont puet tel chose venir
Que je ne voy riens vivent nestre
Qui ne faille a son temps fenir,
5 Hommes, bestes, possons mourir,
Arbres, plant, toute volatille,
[…]
Et en tous ses fais decourable.
Ayons chose mondaine vile.
10 Pensons a la fin pardurable.
Nous, hommes, qui ne devons pestre
Comme animal, mais souvenir
Nous doit que nous avons franc estre,
Et que Dieu homme devenir
15 Voult pour nostre mort afranchir
De la dampnacion horrible 260a
Dont il souffri la mort penible
En nous donnant vie durable
Pour l’esperit intelligible :
20 Pensons a la fin pardurable.
Ce monde est la voie senestre
Qu’il convient en passant courir
A tout homme. Or prenons la destre,
Car la senestre fait perir
25 Corps et ame, l’autre merir
Les bien fais de l’ame invisible
Que Diex, a qui tout est possible,
Met es corps, nature insachable.
Soyons donc au garder habile :
30 Pensons a la fin pardurable.
L’envoy
Prince, trop voy anientir
De jour en jour et defenir
Nature qui est corrompable
Et tout malice consentir.
35 No mort s’aproche sans mentir :
Pensons a la fin pardurable.
