Balade 633 : Puis que je voy tous les meurs bestorner (DCCCCLXXXVIII)
Autre Balade
Puis que je voy tous les meurs bestorner
Et que chascun veult tout faire a rebours,
Vertus fuir et aux vices tourner,
Lessier l’estat de l’Eglize et des cours
5 Qui fu si bon par son ancien cours
Que les vices n’y oserent manoir,
Donc vit l’en peuple et erre valoir,
Dieu honoré, justice estre gardee,
En ce monde ne vueil plus remanoir
10 Que la dance est durement retournee.
Car grant pompe veult l’Eglize mener,
Estat mondain, vaine gloire et honnours,
Ses menistres leur parens gouverner
Des biens de Dieu, faire de divers tours,
15 Vendre, acheter et regner deux pastours
Pour leurs pechiés, on n’en deut c’un avoir.
Je voy es cours l’un l’autre decevoir,
Traisonner, raison dissimulee
Au temps qui queurt, mentir, taire le voir,
20 Que la dance est durement retournee.
Et qui pis est Convoitise regner, 259d
Envie, Orgueil et toutes deshonours
Voy au jour d’uy, chascun desordonner,
Prendre et avoir trop curieux atours
25 A povres gens, maintz[1] eulz vestir si cours
Que leurs culz font comme singes paroir.
Et les femmes font leurs saings apparoir,
Sauvagement ont leur teste attournee.
Et par ces poins puet chascun concevoir
30 Que la dance est durement retournee.
L’envoy
Prince, je tieng que brief devroit finer
Ce monde cy et sa fin terminer
Qui est de mal en pis determinee,
Car je n’y voy fors doulour demener
35 De jour en jour, sans vertu relever,
Que la dance est durement retournee.
[1] Ms. mainlz
