Balade 627 : Orgueil, luxure, oultrecuidance (DCCCCLXXXII)
Autre Balade de luxure et d’orgueil
Orgueil, luxure, oultrecuidance, 257d
Envie et mortel traison,
Convoitise, desordonnance,
Baras, convers ont leur saison.
5 Chascuns het Justice et Raison
Et veult estat de prince avoir.
On ne quiert qu’argent et avoir,
Au bien commun n’est nul enclin.
Par tous ces poins puet ont sçavoir
10 Que le monde approuche sa fin.
Guerre de jour en jour s’avance.
Il n’est priere n’oroison
Vers Dieu, ne nulle obeissance.
Estable font de sa maison
15 Pluseurs. Las ! toute devision
Regne, et menterie pour voir,
Preudoms n’ose les denz mouvoir.
L’Eglise et tout va a declin :
Par ce puet on apercevoir
20 Que le monde approuche sa fin.
Pitié, amour ne congnoissance,
Loyaulté ne porte mais hom,
Honeur, verité ne vaillance.
De toutes vertus nous taison :
25 Le grant orgueil que nous faison,
Fera povreté concepvoir
En general un crueulx hoir,
Vengence, et destruire l’or fin.
Puis doit Antecrist apparoir,
30 Que le monde approuche sa fin.
L’envoy
Prince, je voy tout remoivoir 258a
Et les signes du ciel douloir
Pour nostre dolereus chemin
Riens ne vault ce que deust valoir :
35 Dieux nous vueille a bien esmouvoir,
Que le monde approuche sa fin.
