Balade 626 : Depuis que le diluge fu (DCCCCLXXXI)
Balade du diluge et comment les quatre citéz fondirent
Depuis que le diluge fu
Et que les cinq citéz fondirent
Pour leur pechié, par argent fu,
Que Loth et sa femme en yssirent,
5 Ne puis que les prophetes dirent
Les maulx dont ly mons seroit plains.
Pres de la fin, ly noms Dieu vains
Et sa loy escandalisee,
Ne fut li termes si prouchains
10 D’estre monarchie muee
Comme il est, car nulle vertu 257c
Ceuls de ces .vii. aages[1] ne firent.
Tout est a present corrompu,
Tous estaz mal faire desirent,
15 Doleur fut que telz gens nasquirent,
Orgueilleus, convoiteus, haultains,
Lasches, couars, de cuer villains.
Dont la parole yert avoiree,
Dedenz vint ans, po plus po moins,
20 D’estre monarchie muee.
Car on vent les biens de Jhesu
Autrement qu’apostre ne firent,
Et justice n’a point d’escu :
On het tous ceuls qui l’establirent.
25 Nostre ancien pas ne trairent
L’un l’autre, mais a ses deux mains
Veult destruire, le plus le moins,
Guerre, sanz paix faire, a l’espee.
Et par ce avons signes certains
30 D’estre monarchie muee.
L’envoy
Princes, selon les diz des sains,
Pour leurs pechiéz seront estains
Les pecheurs en place ordonnee
Prouchainement. De leur sang tains
35 Seront les champs. C’est li vrais saings
D’estre monarchie muee.
[1] Ms. sage
