Balade 625 : O Gallican, petit regne adoptif (DCCCCLXXX)
Autre Balade touchant le royaume des François
O Gallican, petit regne adoptif,
[…][1]
Par miracles du roy suppellatif
Clodouveus prinst la crestienté
5 Par Clotilde qui l’ot admonnesté.
De saint Remy fut baptiséz a Reins,
Le saint sacre tramist Dieu en ses mains
Dont tous tes roys sont oins et baptiséz,
Et ce fonda sur .iiii. estos : du mains
10 Entre vous, rois, a ces poins aviséz.
De tous .iiii. soiéz memoratif :
Le premier est Dieu, soit de vous doubté.
Ses ministres vous ayent substantif.
Honouréz les et Dieu, par charité.
15 Le tiers estoc, Justice et Verité
Gardéz tous jours, c’est voz sieges certains.
Le bien commun est le quart. Les Rommains
Par ce laissier furent touz diviséz,
Mors, subjuguéz, et leur empire estains :
20 Entre vous, roys, a ces poins adviséz.
Ces .iiii. estos voy en simulatif
Paroir un po, sanz la proprieté
N’en nul effect, sanz le nominatif, 257b
Car le dedenz est pourry et gasté,
25 Dieu et ses gens, Justice en orphanté,
Le bien commun n’a amis ne prouchains.
De convoiter est ly mondes Cains.
Saiges, prodoms ne vaillans n’est prisiéz.
Regnes tu pers, si ces .iiii. sont frains :
30 Entre vous, roys, a ces poins adviséz.
L’envoy
Princes, je voy tous les vices villains
Qui ont destruit les regnes souverains,
Suyans les cours et estre auctoriséz.
Justice fault, Orgueil va par les plains :
35 Entre vous, roys, a ces poins adviséz.
[1] Vers manquant
