Balade 623 : De toutes pars est mon chief assailli (DCCCCLXXVIII)
Balade comment le chief se plaint moult durement de ses membres : c’est assavoir l’eglise
De toutes pars est mon chief assailli,
Qui cause estoit a mon corps de sa vie.
A mes bras sont vaines et nerf[1] failli,
Les mains, les doiz gardans ma seignourie.
5 Fievre m’assault et mes cuers se varie
Pour les membres qui se dueillent du chief,
Et mes membres soustiennent le meschief 256c
De tout le corps, qui ja tremblent et finent,
Ne je ne sçay de mes maulx le plus grief :
10 Toutes vertus au jour d’ui se declinent.
Qui est ce chief taint, malade et pali,
Qui au jour d’ui pour sa grant doleur crie ?
L’eglise Dieu, quant elle voit en li
Division, et que pas n’est unie,
15 Mais de deux pars est trop fort assaillie.
Braz, vaines, nerfs, pour declarer au brief,
Justice et loy signifient, qu’en brief
Avec raison tindrent les roys, or clinent.
Mains et doys sont des juges le dechief :
20 Toutes vertus au jour d’ui se declinent.
Convoitise a comme fievre envahy
Les cuers des gens et le chief en partie.
S’en est le corps et le monde esbahy :
Par les jambes le peuple signifie
25 Qui soustenir ne puet plus l’envaye
Des maulx qu’il a, mais crie de rechief
Vengence a Dieu, car pain n’a ne relief.
[…][2]
Or et argent, lit, coute et cuevrechief :
30 Toutes vertus au jour d’ui se declinent.
L’envoy
Prince[3], adviséz que chief ne soit peri :
Braz, mains et doiz mourroient sanz detry,
Jambes et corps, qui desja s’i enclinent.
Or faittes donc que ce chief soit gari,
35 Car paour ay quant je voy et vou dy :
Toutes vertus au jour d’ui se declinent.
[1] Saint Hilaire corrige en nerfs
[2] Vers manquant
[3] Ms. Princes
