Balade 622 : J’ay demouré entre les Sarrasins (DCCCCLXXVII)
Balade
La complainte d’un gentil homme marié en aage moien faicte par Eustace en maniere de balade
J’ay demouré entre les Sarrasins,
Esclave esté en paÿs de Surie,
J’ay en vaisseaulx, en galees, en lins,
Esté sur mer, et en nave perie,
5 Par le tourment cuidant perdre la vie.
J’ay combatu en guerre et pour le gaige,
Et es desers a un lion sauvaige,
Et de tout ce me suis bien eschapé,
Et d’autres maulx, fors que de mariage :
10 Or gart chascunsqu’il n’y soit atrapé !
J’ay de larrons esté sur les chemins
Fort assailli, pour faire roberie,
Batuz, navréz et de justice prins
Pour mes debas, pour injure et folie.
15 J’ay demouré en fortresse assaillie,
Siegé devant engins, et, a oultraige, 256b
Pierres canons gettans ou hault estaige.
Par myne j’ay esté prins et happé.
Mais femme avoir m’a trop plus fait dommage[1] :
20 Or gart chascun qu’il n’y soit attrapé !
J’ay tous les maulx dont je fu entrepris
Frains et passéz sanz honte et villenie.
Or est sur moy de femme li venins,
Par marier, qui tous jours brait et crie,
25 Tance et maudit. Douce vierge Marie,
Beau sire Dieux, pour quoy me mariai ge[2] ?
Onques homs n’ot tant de dueil ne de raige.
Par femme suy desert, mort et lappé.
Saiges n’est pas qui entre en tel mesnaige :
30 Or gart chascun qu’il n’y soit atrapé !
L’envoy
Prince[3], homme n’est, ne si foul ne si saige,
Se femme prant, qu’elle ne l’assouaige,
Et qui ne soit par son fait entrapé,
Ne qui sceust respondre a son langaige.
35 Bon eschiver fait ce doubteus passaige :
Or gart chascun qu’il n’y[4] soit atrapé !
[1] Saint Hilaire corrige en dommaige
[2] Ms. mariage
[3] Ms. Princes
[4] Ms. ne
