Balade 621 : Tourment de corps, abregement de vie (DCCCCLXXVI)
Autre Balade morale
Tourment de corps, abregement de vie,
Paine de cuer, lime pour tout lymer,
Perte de sens et de chevalerie,
Traveil sanz fin est de soy marier.
5 Car chevaliers et clercs fault varier
Leurs .ii. estas, l’un sens, l’autre prouesce,
Par femme avoir. Ainsi chascun se blesce
Qu’aux .ii. mestiers n’a leurs femmes ensemble
Ne puet servir nulz que l’un d’eulx n’en blesce :
10 Qui se marie, il est foul, ce me semble.
Car a femme fault estat et mesgnie,
Robes, joyaulx, s’amour continuer,
Meubles d’ostel, garnisons, et lors crie
Quant on lui fait longuement demander.
15 S’elle a enfans, il les fault gouverner,
Nourrice avoir, lors fera la maistresse.
Pour tout querir fault avoir grant destresse.
A son mari s’elle autrui deduit emble
Et il le scet, jamais n’ara leesce :
20 Qui se marie, il est foul, ce me semble.
D’acquerir art clerc sa science oublie,
Et chaveliers ne se puet exercer
En fait d’armes, sa poursuite est perie.
Ainsis leur fault moult de maulx endurer,
25 De criz, de plours, de dangereus parler
Par leurs femmes, et tel doleur ne cesse 256a
Jusqu’a la mort. Dont est ce grant simplesse
A chascun d’eulx quant a femme s’assemble
Pour delaisser franchise, sens, noblesse :
30 Qui se marie, il est foul, ce me semble.
L’envoy
Princes, bons clercs, chevaliers en jeunesce
Ne se doivent pour or ne pour richesce
Bouter ou feu qui art et qui estrangle
Les mariéz, car tous maulx les paresse.
35 Vivent donc frans, chascuns tel lien lesse :
Qui se marie, il est foul, ce me semble.
