Balade 620 : Perverse en cuer, de semblant tricheresse (DCCCCLXXV)
Perverse en cuer, de semblant tricheresse, 255c
Douce en parler, en œuvre venimeuse,
Vaine d’amour, fausse et deceveresse,
Double en voz faiz, haultaine et orgueilleuse,
5 Trop attrayant, d’autrui bien convoiteuse,
Langue tranchant qui ne scet que mesdire,
Nulz ne pourroit voz grans pechiéz descripre,
Les faussetéz ne les desloiaulx tours
Qui sont en vous, Brohadas plaine d’ire :
10 Tous les diables vous aiment par amours.
Fille fustes Circé l’enchanteresse,
Car de charois de sors estes doubteuse,
Phitonique vous fist enhorteresse.
Vous avéz fait mainte euvre perilleuse,
15 Ensorcelé. N’est chose haineuse
Ne mauvestié qui vous puisse souffire,
Vous avéz mis maint prodomme a martire,
Aucuns murdriz et les autres fait sours
Par voz poisons. Du monde estes la pire :
20 Touz les diables vous aiment par amours,
Car vous estes leur dame et leur maistresse,
Royne d’enfer, de tous maulx amoureuse.
O Lachesis, raige et forsenneresse,
Tourment sanz fin, laide, noire et hideuse.
25 Contrefaire vouléz la precieuse,
Je croy que nulz ne vous vit onques rire.
Pour voz grans maulx Dieu vous vueille maudire
Tant qu’ame et corps soit dampnéz a tousjours
Ou puis d’enfer, la sera vostre empire :
30 Tous les diables vous aiment par amours.
L’envoy
Vielle, sote, fausse et enchanteresse,
Visaige d’ours, griffes de lyonnesse,
Voix de torel, vous estes en decours 255d
Menton et peaulx avéz comme singesse :
35 Pour vos grans maulx dont chascun vous delesse,
Tous les diables vous aiment par amours.
