Balade 619 : Pour le doulz temps et pour l’acoustumance (DCCCCLXXIV)
Balade amoureuse
Pour le doulz temps et pour l’acoustumance
Que j’ay aprins et le veu que fait ay
D’Amour servir, a qui suy des m’enfance,
De lui offrir, le premier jour de May,
5 Chançon, rondeau, balade ou virelay, 255b
Me vueil a lui humblement acquiter
Et tout mon fait lui vueil recommander,
En suppliant qu’elle m’ait en sa grace,
Si je suy viel, sanz mon corps despiter,
10 Car en tous fault que jonesse se passe !
Mon jeusne temps, mon labour, ma plaisance
Ay mis, du tout le demourant feray
A bien servir, en tout obeissance,
Celle que j’aym, n’oncques autre n’amay
15 Ne jamais jour autre dame n’aray.
Or me vueille, s’il lui plaist, conforter
Et un chapel en ce doulz mois donner
Pour adoucir la doleur qui m’efface.
Ne me vueille pour viellesce oublier,
20 Car en tous fault que jonesse se passe !
Mais j’ay au fort en li[1] bonne esperance,
Pour les vertus dont garnie la sçay,
C’est de douçour, de pitié, d’atrempance,
D’umilité, d’onneur et de cuer vray,
25 De beau maintien, de bonté, si verray
S’on puet hair ce que l’en seult amer,
Quant on n’y scet que dire ne blasmer,
Fors que le temps de l’aage qui trespasse,
Que l’en ne peut sanz jeune mort tarder,
30 Car en tous fault que jonesce se passe !
L’envoy
Chiere dame, vueilliéz vous ramenbrer
De vo servent et le reconforter,
Car fors que vous n’est qui joye lui face.
Ainsi pourra par vo bien recouvrer
35 Respit de mort et vo sers demourer,
Car en tous fault que jonesce se passe !
[1] Ms. lui
