Balade 618 : Qui a eu des estas moyens (DCCCCLXXIII)
Autre Balade sur les estaz moyens et qu’ilz sont les plus seurs
Qui a eu des estas moyens
Sanz reprouche en ce monde cy,
Et par travail acquis des biens
Dont vivre puet, s’il est ainsi,
5 Il en doit Dieu rendre merci,
Soy retraire tant qu’il a grace,
De Dieu servir prandre l’espace,
Prier ses pechiéz lui pardonne,
Faire bien et qui se soulace,
10 Serve Dieu, face sa besongne.
Car homme qui est clers voyens,
S’ainsi fait, s’oste de soussi 255a
Et n’est chargeus ne ennoieux,
Comme sont li viel endurcy
15 Qui aux cours se sont obscurcy
Tant que chascuns les fuit et chasse.
Ilz sont moquéz, on quiert leur place
Par viellesce ou pour leur vergongne.
En tel cas homs ne se mefface,
20 Serve Dieu, face sa besongne.
Soit de telz estas retraiens
En moyen aage homs, et aussi
Qu’il ait grace et amour laiens
Car puis qu’il partira, je dy
25 De son gré, sanz avoir failli
En tel estat, si le pourchace,
Honneur a. S’il veult, il amasse
Biens temporelz et si esloingne
Moult de perilz. Telz maulx trespasse,
30 Serve Dieu, face sa besongne.
L’envoy
Princes, li homs qui est sciens
Doit de court doubter les liens
Et le trebuchier qu’om ressoingne.
Depart soy, puis qu’il a riens.
35 Trop est cours perilleus merriens :
Serve Dieu, face sa besongne.
