Balade 617 : Se Boeces, de Consolacion (DCCCCLXXII)
Balade en alleguant Boese, de Consolacion, comment il fut moult constant en tribulacion et de grant reconfort
Se Boeces, de Consolacion,
Qui saiges fut et de tel reconfort
Que pour perte ne tribulacion
Qui lui venist n’ot oncques desconfort,
5 Ne pour bien nul ne s’esjouy trop fort
Pour ce qu’il sceut que fortune mondaine
Est inconstant, perilleuse et soudaine,
Vivoit encor, tous seroit esbahis
Des grans horreurs que le monde demaine
10 Et tous estas et par touz les pais.
Petit seroit de s’accusacion,
De son exil, estre jugié a tort,
Sanz lui oir mettre a dampnacion,
Absent aussi, non congnoissant. Dieu dort,
15 Car au jour d’ui le gaingne le plus foort,
Sanz loy garder le plus foible mehaingne,
Et justice est la toille de l’yraingne
Qui ne retient que les povres chetis.
Les grans larrons laisse aler et aplaine
20 En tous estas et par tous les pays.
Mais qui pis est, toute destruction
Se fait des bons, les mauvais ont le port.
Les convoiteus, envye, ambicion, 254d
Pechié de char, tuit vice vil et ort
25 Regnent partout et a si grant effort
Que puis le temps Constantin et Helayne,
Ne devant eulx, ne fut la terre plaine
De tant de maulx, traisons et perils,
Que chascun fait et s’en efforce et painr
30 En tous estas et par tous les pais.
L’envoy
Princes, je croy que la court souveraine
Et les .ix. cieuls, tout ce qui les compaigne,
Les elemens et Dieux en paradis,
Sont tous troubléz des faiz que l’en demaine
35 Contre sa loy, ça jus, en ceste plaine,
En tous estas et par tous les pais.
