Balade 616 : Qui est l’estat en ce monde plus sain (DCCCCLXX)
Autre Balade sur l’estat moyen
― Qui est l’estat en ce monde plus sain
Pour vivre en paix et selon conscience ?
― C’est le moien. ― Et quel ? ― Je le t’aprain :
De sçavoir art labourer et science,
5 Avoir en Dieu plus qu’en homme fiance,
Ouvrer des mains, vivre de son labour,
Sanz trop ne po querir estat n’onour,
Car ce moien ont tuit tenu li saige.
Fay donc le mieulx et pran pour le meillour
10 Labour de mains et hostel de mesnaige.
Car en hault lieu ventent li vent a plain,
Les hauls clochiers destruisent par puissance,
Et les bas lieux demeurent seur, ce tain.
Bon adviser fait ceste consequence.
15 Les grans estas ont toute pestilence,
Trop grant coup prant qui chiet de hault tour,
Plus est navréz que cil qui chiet d’un four,
Et ce sçavoir puet chascun par usaige.
Dont doit amer tout homme de valour
20 Labour de mains et hostel de mesnaige.
Plus vit en paix un povre chapellain
Aux fraiz d’autrui ou par sa pourveance,
Ou un cloistrier, ne fait son souverain,
Ou[1] pour les gens qu’il a maintefoiz pense.
25 A grant seigneur convient trop de despense,
Es grans honours a traveil sanz sejour,
Et de telz gens sont abregé li jour
Et vivent mains que gens en labouraige 254a
Pour leur soussi. Or tien donc, par amour,
30 Labour de mains et hostel de mesnaige.
L’envoy
Prince, qui a terre, aumaille et pastour,
Charrue ou beufs, et scet aler entour
Pour labourer, et a grain et frommaige,
Feves et pois, du gros pain cuit en four,
35 Seurement vit : Dieu nous doint par douçour
Labour des mains et hostel de mesnaige.
[1] Saint Hilaire corrige en Qui
