Balade 615 : Charongne a vers, povre fragilité (DCCCCLXIX)
Autre Balade
Charongne a vers, povre fragilité, 253c
Qui puéz estre comparee a la rose
Qui est boutons et naist ou temps d’esté,
Enmi le jour s’espanit, lors desclose
5 Odoure un pou et plaist, mais la nuit close,
Flour et bouton et rose est amatie :
En mains d’un jour est sa beauté perie.
Certes autel est il d’omme et de femme.
En un moment perdons corps, ame et vie :
10 Dieux nous vueille garder et Nostre Dame !
Ne muert enfans en sa plus grant beauté,
Femme en jouvent, homs aussi ? Comment ose
Orgueil avoir, fors que simplicité
Et craindre Dieu ? Comme trespo de chose
15 De fer, de fust ou de fievre l’enosse
Uns povres vers, yraingne ou orillie,
Le mors d’un chien ou beste qui le lie
Le fait mourir et mettre soubz la lame
En moins de temps que flour n’est espanie.
20 Dieu nous vueille garder et Nostre Dame !
Las ! que nous vault nostre grant parenté,
Noz grans palais, nostre grant cité close,
Noz grans tresors, li regne conquesté,
Force de corps, nostre sens et la glose ?
25 Tout ce ne puet deffendre nostre fosse.
Sanson est mort, Alixandre et Urie,
Crisés, David, Salemon, Jheremie,
Et tout mourrons en paiant celle drame.
Es biens mondains ne soit nulz qui se fie :
30 Dieu nous veuille garder et Nostre Dame !
L’envoy
Prince et seigneur, ne vous confiéz mie,
Ne homs mortelz, en chose qui varie.
Le corps mourra. Or pensons donc de l’ame,
De Dieu servir et la vierge Marie,
35 Ou autrement nostre gloire est perie :
Dieu nous vueille garder et Nostre Dame !
