Balade 614 : A proprement exposer fait de court (DCCCCLXVIII)
Autre Balade des perilz qui sont a suir la court
A proprement exposer fait de court,
Sont mains perilz pour l’ame et pour le corps,
Car Convoitise o les curiaulx court,
Envie y est et dedenz et dehors,
5 Excés s’i font, dont mains ont esté mors
Avant leurs jours ordonnéz en nature. 253b
La sont travaulx, paines, labours et cure,
Qui veult servir et faire son devoir.
Et sanz labour on n’y a d’omme cure :
10 Bon fait sanz court vie et chevance avoir.
Car vanitéz temps perdu y decourt
En attendant estas, honeurs, rappors.
Le jeunes temps s’enfuit, viellesce acourt,
Les grans estas, les honours et les ors
15 […]
Ly corps se duelt par traveil et froidure,
En languissant va a sa sepulture.
Pour tout le sien voulroit santé avoir,
Mais mourir fault. Vez ci sentence dure :
20 Bon fait sans court vie et chevance avoir.
Et, qui plus est, homs qui n’y scet du hourt,
Mordre, blandir, soy tenir aux plus fors,
Dissimuler, muyaux, aveugle et sourt
Estre souvent, ja n’y sera ressors
25 Ne n’aquerra[1] vaillant .ii. harens sors.
Qui grans y est, il est en adventure
De perdre tout par un cas d’amesure
Et l’ame aussi, s’il n’a fait son devoir
De servir Dieu, pour aquerir ordure :
30 Bon fait sans court vie et chevance avoir.
L’envoy
Prince, servir mondaine crëature,
Oublier Dieu, est pechié et injure
Dont es cours voy maint homme decepvoir.
Mais servir Dieu et vivre sanz laidure
35 De son labour est vie nette et pure :
Bon fait sans court vie et chevance avoir.
[1] Ms. naquerra ja
