Balade 613 : Se ce n’est sens ou grant chevalerie (DCCCCLXVII)
Autre Balade
Se ce n’est sens ou grant chevalerie,
Chastel ou lieu de grant auctorité,
Le demourant ne dure fors a vie
Que tout ne soit a la mort expiré :
5 Mais Memoire, qui tant a proufité
Par le moien de lettre et d’escripture,
Et figurer de taille ou en painture
Le sens d’autrui, la prouesce et vaillance,
Font aprés mort congnoistre creature,
10 Et ce sçavoir nous fait Experience.
Car nous veons renommer par clergie
Roy Salemon en la divinité,
Saint Augustin, Jherome, Jheremie, 253a
Des quelz les diz sont souvent recité.
15 Alixandre qui fist mainte cité,
Hector, Cesar, les .ix. preux qu’om figure,
Pompee aussi, mainte bataille dure
Que tous ces rois firent par leur puissance,
Dont leurs noms vit, eulx mis en sepulture :
20 Et ce sçavoir nous fait Experience.
Romme que fist Romulus certifie
Et de Remus leur haulte voulenté,
Lixebonne q’Ulixes a bastie,
Maint fort chastel et mainte fermeté
25 Que pluseurs ont a leur vie fondé
Et mis leurs noms, les font par la droiture
D’edifier et de chastel qui dure
Vivre a tousjours par renom qui s’avance
Aprés leur mort, estans en pourreture :
30 Et ce sçavoir nous fait Experiance.
L’envoy
Prince, qui puet doit bien mettre sa cure
D’acquerir sens, et pour prouesce endure
Tant que d’armes puist avoir congnoissance.
Edifier puet et doit par mesure.
35 S’ainsi le fait, mort, vivra sanz laifure,
Et ce sçavoir nous fait Experiance.
