Balade 612 : Vous qui vouléz servans avoir (DCCCCLXVI)
Autre Balade sur les serviteurs
Vous qui vouléz servans avoir
Pour vous servir honnestement,
Je vous faiz deux choses sçavoir
Que vous sachiéz : premierement
5 Que sobre soit. Secondement
Qu’il ne soit chaut ne rumoreux,
Car c’est services perilleux
Et qui empire la besongne.
Il vauldroit mieulx estre touz seulx
10 Que prandre rumoreus n’yvrongne.
Car homme yvre fait esmouvoir
Par son parler communement
Pluseurs, dont il fault recevoir
A aucuns dolereus tourment.
15 Car il dit villennie et ment
Pour le vin qui le fait fumeux.
Il fiert, il devient oultagreux.
On le bat, chascun le ressongne :
Il vauldroit mieulx garder trois leux
20 Que prandre rumoreux n’yvrongne. 252d
Encor vault pis, au dire voir,
Homs rumoreux naturelment,
Car perdre fait corps et avoir
Par sa rumour, en un moment,
25 A ceuls qui ne scevent comment
La noise vint du maleureux.
Or d’en gardent celles et ceuls
Qui ont de mal faire vergongne :
Car c’est peril trop merveilleux
30 Que prandre rumoreus n’yvrongne.
L’envoy
Princes, chascun soit amoureux
De varlet simple et gracieux,
Sobre, soufrant, et qu’il ne grongne,
Qu’il ne soit lent ne paresceus.
35 Mieulx vault avoir servent doubteux
Que prandre rumoreus n’yvrongne.
