Balade 611 : Sectes de loys, mutacions (DCCCCLXIV)

Autre Balade

                        Sectes de loys, mutacions
                        D’empires, haines couvertes,
                        Mors soudaines, grans mocions,
                        Seront par tout le secle certes
5                      Si soudainement descouvertes
                        <Que nulz ne les congnoistera
                        Jusqu’a ce que prins se verra>[1]
                        Par la vengence du hault juge
                        Qui les grans pecheurs destruira :
10                    Or quiere chascun son refuge.

                        Fouldres, feu, inundacions,
                        Dix plaies nous seront ouvertes,
                        Verges de fer, occisions,
                        Et tout venrra par noz dessertes.                                                      252a
15                    Ly mondes ne reçupt telz pertes
                        Ne telz tourmens puis le diluge
                        Dont l’en voit les voies appertes :
                        Or quiere chascun son refuge.

                        Car les mauvaises nascions
20                    Qui aux autres font les souffertes
                        Pour leur maulx et pugnicions
                        Seront chars aux oiseaulx offertes
                        Par les champs. Leurs riches couvertes
                        Et leurs despoilles, dont Dieu juge,
25                    Seront de fiens recouvertes :
                        Or quiere chascun son refuge.

                        L’envoy

                        Prince[2], autre refuge n’y a
                        Fors de bien faire qui vouldra
                        Et d’amer Dieu, ainsi le lu ge,
30                    Et certes qui ne le fera
                        Des .x. plaies sa part ara :
                        Or quiere chascun son refuge.

[1] Vers surnuméraires

[2] Ms. iPrinces